Maso akak jadi cikgu skolah kek kolopilah dulu, ado lah soghang hambo Allah ni yang suko bona berbincang soal bahaso secagho ilmiah. Akak memang hormat dan tabik datuk nenek bilo sedagho akak ni bukak mulut berdebat. Cumo masaalah eh, tiap kali sedagho akak ni berhujah, mudah pulak jadi betaki. Sobab sedagho akak ni suko lagu Sheila Majid yang berjodol Emosi gamak eh.
.
Kadang-kadang tu bondo yang buang karan, buang maso malah buang air pun nak ditaki an. Akak ni dah pesen suko aman damai, maleh nak masuk campo. Sampai lah satu pagi… akak ghaso itu kali yang ke semilan puloh tigo akak mengucapkan ucapan Slamat Pagi bilo melangkah masuk ke bilik cikgu. Alih-alih, sedagho akak ni menjawab, “Pagi memang dah slamat dah oiii. Ekau yo laie yang tak ghoti-ghoti nak bagi salam cagho oghang kito. Pepagi Jemaat ni eloklah bagi salam oii.”
.
Akak maleh nak bawak betaki di pagi Jemaat yang mulio takdo pancha roba, pancha delimo apo tah laie pancha sitara tu. Sedagho akak yang tetibo nak jadi pancha roboh kotonangan ni yang buat akak maleh nak buat cagho oghang kito ni tauu. Tak mengaku akak ni oghang dio kalau gitu cagho eh nak monogur.
.
Akak pun menjawab dongan tersongeh-songeh sobab memang nak menunjukkan akak pun boleh dibawak bersongeh kalau sedagho akak tu nak banyak songeh dongan akak ni…
.
“Setau sei, namo pokan kito ni Kolopilah, tak jauh dongan Juasseh. Ko dah tuka namo eh jadi Jeddah? Kono blaja la sei ni bahaso saudi yo? Takpo. Sei tunggu ekau pakai jubah putih kepalo belilit seghoban petak-petak, datang skolah naik unto. Pandai lah nanti sei ni tanyo soklan selain marobbuka.”
.
Slamat Pagi oghang Tanjung Ipoh! Slamat Pagi oghang nogoghi kek Mirrabooka, Perth, Ostrolia nun.
.
.
Questa è Enida 
wakakakakakakakaka
Apa gelak-gelak kan orang ni ha? Saper gelak kuat-kuat nanti perut dia kembung masuk angin, alip lam lam ha.
apo ko roman oghang macam tu? inilah oghang kito kok nak nunjuk alim yo, konolah nukar ghupo segalo macam pak arab.takdo der pasal borkelubung macam dalam gobar meningkat iman ko atau bertambah melayu der.elokla tak dilayan oghang macam nih, ngabehkan bogheh yo.
Memang boto cakap kau tu Da. Pado fikiran akak lah an, apo bahaso pon… kalau akak mendoakan yang baik yo, baiklah niat akak. Tughun temughun datuk nenek kito bilo mengucapkan ucapan Selamat Pagi maksud eh supayo selamatlah ndaknyo kito semuo dipagi aghi ni. Bukan lah maksud eh nak menyelamat kan pagi. Daghi akak menyumpah seghanah jumpo oghang asek cakap “يقطع نصيبك يقطع نصيبك” ! Baik akak cakap bahaso yang akak paham. Samo yo maksud bagi salam dongan ucapan Selamat Pagi tu. Yang bezo eh cumo bahaso.
Dah, akak nak buek site visit ni haa ke dapur. Nak menggaramkunyit ikan herring nak digoreng garing. Ewah! 🙂